How did Belisha touch you?

እንቁዋን እህቴን በልሻዬን በመቀሌ ዩኒቨርሲቲ ከተዋወኳት ከሃያ አመት በላይ ሆኗል፡፡ በዩንቨርሲቲ ቆይታዋ በበጎ አድራጎት ክፍል አገልግሎቷ እና ከዩኒቨርስቲው ማህበረሰብ በሙሉ ጋር በነበራት መልካም ግንኙነት ትታወቃለች፡፡ ሳቋ እና ጫወታዋ አይጠገብም፡፡ በትምህርቷ፣ በመንፈሳዊ ህይወቷ እና በማህበራዊ ግንኙነቷ የተዋጣላት ሰው ነበረች፡፡ ወደ ሥራ ዓለም ስትቀላቀልም ያላትን ብርታት አጠናክራ ቀጥላለች፡፡ የእግዚአብሔር ፈቃድ ሆኖ ከወንድሜ አቤ ጋር የትዳር አጋር በመሆን ያለን ትስስር ወደ ቤተሰብነት ተሸጋገረ፡፡ በልሻዬ ለቤተሰባችን ሰብሳቢ፣ አሳቢ እና ደስታን ፈጣሪ በመሆን ቆይታለች፡፡ በተለይ ለባለቤቷ ለወንድሜ አቤ ህልሞች ስኬት ቁልፍ ሚና ተጫውታለች፡፡ ለብርቅዬ ልጆቻቻው፤ ለቤቲ፣ ኤሚ እና ሜሉም የሚሳሱላት ልዩ እናት ነበረች፡፡ በልሻዬ በባህሪዋ በጎ፣ መልካም፣ ሩህሩህ፣ ደግ፣ ቅን አሳቢ፣ በፍጥነት ከሰው ጋር የምትግባባ፣ጫወታ አዋቂ እና ደስተኛ ነበረች፡፡ በጣም የሚገርመው ነገር በልሻዬን ከልጅነት እድሜዋ አንስቶ በህይወት እስከ ተለየችን ጊዜ ድረስ የሚያውቃት ሰው ሁሉ የሚገልጻት በአንድ አይነት ሁኔታ ነው፡፡ የማይቀያየር እና የማይዋዥቅ ባህርይ እና ማንነት፤ ምን አይነት መታደል ነው? “ደግ ሰው አይበረክትም” እንደሚባለው ሆነና በረጅሙ ስናቅድ በልሻዬ በአጭሩ ተለየችን፡፡ እኛም መሪር ልቅሶ እና ሀዘን ውስጥ ብንወድቅም የጌታ ፈቃድ ይሁን ብልን ዝም ብለናል፡፡ በልሻዬ ለጥቂት እድሜ የኖረች ቢሆንም የባከነ ጊዜ ያልነበራት በመሆኑ ረጅም አመት ከሚኖሩት በላይ በሁሉም ረገድ ተሳክቶላታል፡፡ አሁን ደግሞ በህልፈቷ ለሌላ ታላቅ አላማ እያሰባሰበችን ነው፤ ለተቸገሩት ድጋፍ የሚያደርግ እና በስሟ The Belisha Foundation ተብሎ የተሰየመው ድርጅት በበጎ አድራጎት ሥራ ለመሰማራት ዝግጅት ላይ ይገኛል፡፡ እንግዲህ ሁላችንም ለዚህ ድርጅት የበኩላችንን ድጋፍ በማድረግ በልሻ የምትታወቅበትን በጎነትን እና መልካምነትን እናስፋፋ ስሟንም ከመቃብር በላይ እናውለው፡፡
እግዚአብሔር አምላክ የአስካለ ጊዮርጊስን ነፍስ በአጸደ ገነት በቅዱሳኑ እቅፍ ያሳርፍልን!