How did Belisha touch you?

በልሻ በእኔ ዘንድ ያላትን የታላቅነት ቦታ ቀን ተሰጥቶኝ ስተርካት ብውል ደክሞኝ ላቆም እችላለሁ እንጂ እንደማልጨርስ አውቃለው። ለዚህ ጥያቄ ምላሽ ለመስጠት የቱን አንስቼ የቱን እንደምተወው ግራ ግብት አለኝ።
ስለትውውቃችን በትዝታ ላስታውስ ወይስ ስለ ፀባይዋ ላውሳ? ስለ ተጫዋችነቷ ጨዋታዎቿን እያጫወትኳችሁ ልናገር ወይስ ከልብ ሰው አክባሪ መሆኗን ልመስክር? ስለ ጉብዝናዋ የማውቀውን ልንገራችሁ ወይስ ስለ ትዳርና ቤቷን አክባሪነቷ ልናገርላት? እግዚአብሔርን እንዴት ትፈራው እንደነበር ስለ እምነት ጥንካሬዋ ላውሳ ወይስ ስለ በጎ አሳቢነቷ ልመስክርላት? ስለ እንግዳ ተቀባይነቷ የተቀበለችኝን አቀባበል እያከታተልኩ ልጻፍ ወይስ ስለማይጎድል እህትነቷ? እያንዳንዱ ነገሯ ገጽ በገጽ የሚተረክ ታላላቅ ርዕስ ሆኑብኝ።
ሰው ስለ በልሻ ሲናገር ወይም ሲጽፍ አሊያም ሲያስብ መቼም በኅሊናው ትውስታ ከነ በጎነቷ እየተመላለሰች አሁን የሆነ ያክል እስኪመስለው ደስ የሚያሰኝ በብርሃናት ቀለም የተቅለመለመ ምስል ይታየዋል። አሁን ይህን እየጻፍኩ ሳቋ ፣ ጨዋታዋ ፣ ሰው አክባሪነቷ ፣ እንስፍስፍ የሚለው የእናት አንጀቷ (አሜሪካ ከቤቷ ስትሸኘን ምግብ በምሳ ዕቃ ቁጥር ታደርግና ሳናያት መኪናችን ውስጥ ድብቅ አድርጋ የምታስቀምጥልን) ብቻ የትዝታ ፈረስ ወደኋላ ሽምጥ ወስዶ ብዙ አስታወሰኝ። በተጠየቀው አጭር ጥያቄ የማያጥር መልስ እንደመመለስ አስጨናቂ ነገር የለም።
ለእኔ በልሻን እንደማወቅ ዕድለኝነት የለም። እርሷ ለሁላችን እርሷ ናት። አሁን ግን ወደ ሚሻለው የእግዚአብሔር መንግስት ሄዳለች። እርሱ እግዚአብሔር ነውና የወደደውን አድርጓል። ስለዚህም እግዚአብሔር ይመስገን እያልኩ ሁላችንም ውለታዋን የምንመልሰው ራዕዩዋን በማስፈፀም በመሆኑ በታሰበው በጎ ነገር ሁሉ እንዳንጎድል የአደራ መልዕክቴን አስተላልፋለው።
እግዚአብሔር የአስካለ ጊዮርጊስን ነፍስ በአጸደ ገነት በቅዱሳኑ እቅፍ ያሳርፍልን!
ወንድምሽ ጆኒ ግርማ