How did Belisha touch you?

በልሻዬ ሆዴ አንጀቴ የቤታችን ንግስት፣ የጎጇችን ጌጥ፣ የልጆቻችን ኩራትና ሞገስ ፣ የሰፈራችን ሰብሳቢና መካሪ፣ የዘመድ አውራ፣ አርቆ አሳቢ የጫወታ አዋቂና አድማቂ፣ የኔዋ ንግስት ናት። እንደምንም እየገፋነው ነው። ሃዘንማ ለርሷው ያልታዘነ ለማን ይታዘናል። ውሎአችንም አዳራችንም እርሷን ስለሚያስታውስን በቀላሉ የሚገፋ አይደለም፡፡ ጊዜ የሚፈታው ነው፡፡ ላላፉት 18 ዓመታት በጓደኝነትም በትዳርም ላሳየሽኝ ደግነት፤ እንክብካቤ፤ ክብርና ፍቅር እጅግ አድርጌ አመሰግንሻለሁ፡፡ ያንቺን አይነት ሰው የሚያገኙት እድለኞች ናቸውና፡፡ የኔ ውድ ካንቺ ጋር ለተወሰኑ ደቂቃዎች ጊዜ ማሳለፍ እንኳን መታደል ነው አይደለም 18 ዓመታት፡፡ ለትልቁም ለትንሹም የምትለግሽው ተፈጥሯዊ የፈገግታ ፊት፤ ትህትናና እንክብካቤ እጅግ እጅግ ይማርካል ሁሌም ይናፍቃል፡ እንዴት ታድለሻል እናቴ።
ለቤተሰብሽ ያለሽ ፍቅር እጅግ የተለየ ነው። ሁሉም ሰው ቤተሰቡን ይወዳል ግን ያንቺ ልዩ ነው። ላንቺ ቤተሰብ ማለት ሁሉ ነገር ነው፡፡ የቤታችን ምሰሶ ነሽ፡፡ የዘመድ የወዳጅ አውራ ነሽ፡፡ የምታሳይን ልክ የሌለው ፍቅር አጥንት ሰርስሮ የሚገባ ነው፡፡ እሱን ማጣት ማለት ጥልቅ ሐዘን ነው። እንዴት በቃላት ይገለጻል፡፡ ፈገግታሽ በሥስት የሚያዩን ቆንጅዬ አይኖችሽ ናፈቁን ሆዴ አንጀቴ። ልጆቻችን መቼም ያንቺኑ አይነት ፍቅርና ጥንካሬ የሚላበሱ እንደሚሆኑ ምንም ጥርጥር የለኝም።
አምሳያዋ እንቁዎቹ ልጆቻችን አሁንም እንደ ብረት ጠንክረው ሃዘኑን ዋጥ አድርገው ትምህርታቸውን በበለጠ ጥንካሬ እያስኬዱት ነው። በጆሮ ሹክ የሚላቸው አጽናኙ አጽናንተዋቸዋል እንጂማ ማን ደፍሮ ያናግራቸውዋል። እነሱም የሚያናግራቸው በፍጹም አይፈልጉም። ማሚ የተሻለ ቦታ ናት፣ ከምትወደው አምላኳ ጋር ናት ተባሉ፣ ተማሩ አመኑ አለቀ። የስድስት ዓመቷ ሜላት አንድ ቀን Mommy is in a better place ብዬ ገና ሳልጨርስ Everybody is saying that. Can you please stop saying that? I know that she is in a better place. You make me sad when you keep talking to me like that. ካለችኝ ቀን ጀምሮ የምናገረውን ቆጠብ አድርጌዋለሁ። ብርቱ ናቸው ልጆቹ። ለነገሩ ስለሞቷ ከሰው ጋር ማውራት እስከ አሁን ለኔም ይከብደኛል። ይነዝረኛል፡፡ ሁላችሁንም አሁንም ከልብ እናመሰግናለን፡፡ እኔም፤ ልጆቹም መላው ቤተሰብ ደህና ነን አታስቡ፡፡
እግዚአብሔር የአስካለ ጊዮርጊስን ነፍስ ከቅዱሳኑ ጋር ያሳርፍልን::