ምስጋና ለበልሻ
በልሻ እንዴት ነሽ?
አዲሱን ዓመት እንዴት አሳለፍሽው?
በጠባቧ ቤት? እኛስ አለን ብዙ ነገር ጎሎብን፣
ሳቅና ጨዋታሽ ጠፍቶብን በእንባ ተሞልተን።
በልሻ ቤት የገባች ዓለም በሰላም አትወጣ
በረጅም ብርጭቆ ኮሶ ሳታጠጣ
የካናዳ ዘመድ ባለህበት እርጋ
የበልሻ ቤት ተዘጋ በጠጋ
የዲሲውም ዘመድ ባለግበት እርጋ
የበልሻ ቤት ተዘጋ በሳጥን
የኢትዮጵያ ዘመድ ባለህበት እርጋ
የበልሻ ቤት ተዘጋ ባፈር
አልዲ ላይ የወረደው ናዳ
በልሻን ነው እንጂ ሌላ ሰው አልጎዳም።
ምነው አባቶች አታልቅሺ ይሉኛል
እኔ ላልቅስ እንጂ ውስጧን ስለማውቅ፣
ሦስት ዓመት ሙሉ መቀስ ለበላት።
በልሻ አትመጪም ወይ ቤተሰብ አትናፍቂም ወይ?
በየት ልምጣ ካንሰር ቆረጠብኝ እጣ
አበበ በጣም አትዘን ሚስት የሞተችበትን ጠይቀህ እደር
ምንም ቢመሽብኝ እድንጋይ ሥር ባድር
የኔ በልሻ ሳልልሽ አላድርም
ኧረ መሸ ይህ ቀን ወዳጅ ወዳጁን አሸሸ
የኢትዮጵያ ደሀ እሪ ብልሽ አልቅሽ
በልሻ ሞታለች የሰንበት ምሳሽ
የበልሻ እኅት በጣም አትዘኚ
እኅት የሞተባት ጠይቀሽ እደሪ
የበልሻ ልጆች በጣም አትዘኑ
እናት የሞተባቸውን ጠይቃችሁ እደሩ
አባቶች በጸሎት ዶክተር በመድኃኒት
ቤተሰብ በገንዘብ እንተባበር
ይህንን ካንሰር እናጥፋ ከሀገር
አስቸግሮናል ቆንጆ እየቀጠፈ
የበልሻን ወርቅ አምጡላት አብራችሁ ቅበሩት
እርግፍ ይበል እንደባለቤቱ
የበልሻን ልብስ አምጡላት አብራችሁ ቅበሩት
እርግፍ ይበል እንደባለቤቱ
ምነው አባቶች ሲያለባብሱሽ ሲያረጉሽ ሙሽራ በቤተክርስቲያን፣
ምነው ዲያቆኖች ሲያለባብሱሽ ሲያረጉሽ ሙሽራ
አትያቸውም ወይ ልጆቼን ላሳድግ?
መስከረም ሲመጣ አበባ ያብባል፣
የዘንድሮው ዝናብ ልክ አይደለም መሰል
በልሻ የአበበ አበባ ስትከስም አየኋት።
ቦብሻ ልጄ ልጄ ብለው ብትንገበገቡም
እንጀራ ነው እንጂ ልጅ የእዝን አይገባም
ምድር አትቆጪ ቀስ ብዬ እረግጣለሁ
ነገ ታች በታች መሆኔን አውቃለሁ።
አልቅሰን አልቅሰን ልብሳችን ርሷል
ካምናው ክረምት የዘንድሮው ብሷል
እንዲያው ደፋ አለች ያች ዝሆን ምን ሆና ይሆን?
ወንድሞቼ ቄስ ገብረሥላሴ፣ ቄስ አውግቸው፣ ገብረሕይወት ንጉሴ
እንኖራለን በእግዚአብሔር ቸርነት
እናንተ ባፈር ውስጥ እኔ በስደት
በልሻ ላጠፋሁት፣ ለተሳሳትኩት ነገር ሁሉ ይቅርታ!
from
November 5, 2023 at 2:23 pm