በልሻዬ ተወልዳ እስከ 5 አመቷ ድረስ አብረን ነበርን። በነዚያ 5 ዓመታት ከቤታችን ላሞች የሚታለብ ትኩስ ወተት እየጠጣች የእናቷንም ጡት እስከ 5 ዓመቷ ጠብታ አደገች። በጣም ድንቡሽቡሽ ስለነበረች እኔ ብቻ የምጠራት ስም ነበራት፤ ቹሉ ነበረ የምላት። ከ 5 ዓመቷ በኋላ ወደ አዲስ አበባ መጣች፤ ከዛ በኋላ አብሬአት የማደግ እድሉ ባይኖረኝም ክረምት ላይ ትመጣ ነበረ። ክረምት ስትመጣ እሷ አማርኛ ብቻ ስለምትናገር አባታችን ደግሞ ኦሮምኛ እና አማርኛ እየቀላቀለ ስለሚናገር ማታ ማታ ሁሌ ቤታችን በሳቅ የተሞላ ነበረ።
በልሻ ማለት ለኔ በእርግጥ የታናሼ ታናሽ ናት ግን ከልጅነቷ ጀምሮ በጣም ሳቂታ እና ተጫዋች ነበረች።
እንደ በልሹ ከቤታችን ወተት እና የእናታችንን ጡት የጠባ የለም። ወተት የምትጠጣው የመጀመሪያዋ ላም ስትታለብ ኩባያዋን ይዛ ትቆማለች፣ ልክ ሲያልቅ ትኩሱ ከነአረፋው ይሰጣታል እሱን ትጨርስና ደግሞ ሁለተኛዋ ላም ታልባ እስክትጨርስ ኩባታዋን ይዛ ትቆማለች፣ ልክ እንደመጀመሪያው ትኩሱ ከነአረፋው ይሰጣታል እሱንም ትጠጣለች፣ ለሚታለቡት ላሞች ሁሉ እንደዛ ታደርጋለች፤ ሁል ጊዜ ጠዋት እና ማታ እንደዛ ነበረ የምታደርገው። ትልቅ ሆና ድረስ የእናታችንን ጡት ትጠባ ስለነበረ ሰው እንዳያያት የእናታችንን ቀሚስ በጎን ቀዳ ተደብቃ ነበረ የምትጠባው።
ከእህቴ ጋር በጣም እየተዋደድን አክስቴ ልታሳድጋት ወደ አዲስ አበባ ወሰደቻት። እኔም 6ኛ ክፍል ጨርሼ ወደ አዲስ አበባ መጣሁ። አዲስ አበባም የተለያየ ቦታ ስለምንኖር በተወሰነ ጊዜ ብቻ ነበረ የምንገናኘው። ከ11ኛ ክፍል እስከ ዩኒቨርሲቲ ድረስ ግን አብረን ባንኖርም በጣም እንገናኝ ነበረ።
በልሹ ከቤታችን የአባታችንን ባህርይ የወረሰችው እሷ እና እሷ ብቻ ነች። ለኔ ብዙ ነገር ታስብልኝ ነበረ። የጉብኝት ወረቀት ልካልኝ ሁለት ጊዜ ኤምባሲ ገብቼ ተከልክዬ በሶስተኛው እግዚአብሔር ፈቅዶ ተፈቀደልኝ። በጣም ስለምወዳት ልጄን፣ ባሌን፣ ባጠቃላይ ትዳሬን ትቼ መጣሁ። ከመጣሁ በኋላ በጣም ብዙ ነገር አስተምራኛለች። በተለይ ደግሞ ፍቅርን ሰጥታኛለች አስተምራኛለች። በዚህች አንድ ዓመት ብዙ ነገር፣ እኔነቴን የሚቀይር ምክር መክራኛለች።
በሉሻዬ የእናቴ ልጅ ስላንቺ ልናገር ብል አንድ መጽሐፍ አሳትማለሁ ግን በትንሹ እችን ማስታወሻ ጽፌአለሁ። በልሻዬ አደራ ያልሽኝንም እግዚአብሔር ከረዳኝ ልፈጽም ቃል እገባልሻለሁ። የእናቴ ልጅ ስሄድም ስተኛም ሁሌም እወድሻለሁ። ሀዘኑ በጣም ከበደኝ። ከእግዚአብሔር የመጣ ስለሆነ ምን ማድረግ እችላለሁ።
በጣም በጣም የምወድሽ እና ሁሌም አጠገቤ መሆንሽን ነው የማስበው። ይሄ ክፉ ሞት የሚሉት ለያየን።
ነፍስሽን ከቅዱሳን ጎን ያሳርፍልን።
በጣም የምወድሽ እህትሽ።
from
October 31, 2023 at 11:16 am